የአዲስ አበባ ከተማ አስተዳደር ደንብ ማስከበር ባለስልጣን ዋና ስራ አስኪያጅ መልዕክት የሀገራችን ርዕሰ ከተማ የሆነችው አዲስ አበባ በውስጧ በርከት ያለ ሕዝብ በመያዝ በሀገሪቱ ብዙ የሕዝብ ቁጥር የሚኖርባት ቀዳሚ ከተማና የበርካታ ዓለም አቀፍ ዲፕሎማቶችና ኢንባሲዎች መቀመጫ ናት። በአሁን ወቅት የሀገሪቱን ዕድገት ተከትሎ ከተማዋ ዓለም አቀፍ የዘመናዊ ከተማ ደረጃዎችን ለማሟላት በተለያዩ የልማት ስራዎች በማከናወን ላይ ትገኛለች ፡፡ የአዲስ አበባ ከተማ አስተዳደር ደንብ ማስከበር ባለስልጣንም በከተማ አስተዳደሩ ከተሰጡት 9 ዋና ዋና ተግባራት በተጨማሪ በተለያዩ የፀጥታ ስራዎችና በበጎ ፍቃድ አገልግሎት የልማት ስራዎች ከባለስልጣኑ ከፍተኛ አሞራሮች እስከ መስክ ኦፊሰሮች ድረስ ሰፊ ተሳትፎ በማድረግ ላይ እንገኛለን ፡፡ ባለስልጣኑ በከተማ አስተዳደሩ በአዋጅ የተሰጡትን ተግባራት ለማሳካት ተቋሙ አጠቃላይ ሪፎርም በማድረግና ቀድሞ ሲጠቀምበት የነበረውን ደንብ ቁጥር 54/2005 ላይ ሰፊ ጥናት በማካሄድ ማሻሻያ አድርጎ ለከተማ አስተዳደሩ ምክር ቤት ረቂቅ ደንቦች አቅርቦ ደንብ ቁጥር 150/2015 በማፀደቅ ወደ ስራ መግባቱ ይታወሳል ፡፡ የከተማ አስተዳደሩም ለተቋሙ በሰጠው ልዩ ትኩረት መሰረት ግብረ ኃይል በማደራጀት ከተማዋ ከሸራ ቤቶች ነፃ በማድረግ እንደዚሁም የትውልዱን አዕምሮ እየበረዘ የነበረውን ቤቲንግ/ቁማር / ቤቶች ከባለድርሻ አካላት ጋር በመሆን በመቆጣጠር የወላጆችን ጥያቄዎች መመለሰ ተችሏል። ባለስልሶኑ በሌሎችም አጠቃላይ የደንብ መተላለፎች ላይ ከተለያዩ ባለድርሻ ተቋማት ጋር ተቀናጅቶ ሌት ተቀን በመስራት በከተማዋ ውስጥ የሚስተዋሉ ህገ- ወጥነቶችን በቅድመ መከላከል ስራዎች በመቀነስና ህግ ተላልፎ የተገኘውንም አካል በደንቡ መሰረት በመቆጣጠር እና እርምጃ በመውሰድ አመርቂ ውጤቶችን አስመዝግበናል ፡፡ በበጀት ዓመቱ በተከናወኑ የደንብ ማስከበር ስራዎችም አብዛኛው የከተማ አስተዳደሩ ማህበረሰብ ከወትሮ በተሻለ መልኩ ለተቋሙ አጋርነቱን በተለያዩ የንቅናቄ መድረኮች ላይ በመገኘትና በተቋሙ ነፃ የስልክ መስመር 9995 እንዲሁም በአካል ድረስ በተቋሙ የወረዳ ጽ/ቤቶች ጭምር እየተኙ ጥቆማና አስተያየቱን በመስጠት ተስፋ ሰጪ ውጤት ታይቷል ፡፡ በቀጣይም ተቋሙ ከተማ አስተዳደሩ የሰጠውን ተልዕኮ ለመወጣት ከመቼውም ጊዜ በላይ ዝግጁ መሆኑን እየገለጽኩ ህብረተሰቡ ከተቋሙ ጎን በመሰለፍ የደንብ መተላለፍን በጋራ ለመከላከል ላሳየው ቁርጠኝነት በተቋሙ ስም ላመሰግን እወዳለሁ ። ቀሪውም ህብረተሰብ ከተቋሙ ጎን ተሰልፎ ህገ- ወጥነትን በመፀየፍ ህግና ደንብን ማክበር የስልጣኔ መገለጫ መሆኑን እንዲያረጋግጥ መልዕክቴን አስተላልፋለሁ ፡፡ ሻለቃ ዘሪሁን ተፈራ የአዲስ አበባ ከተማ አስተዳደር ደንብ ማስከበር ባለስልጣን ዋና ስራ-አስኪያጅ